2014年4月23日星期三

蛇仔進軍流動分銷


上星期本港上市嘅蛇仔(00529),宣佈同John Sculley合作。呢位John Sculley就係以前Steve Jobs力邀從百事可樂跳槽,原本賣緊糖水,過檔蘋果一齊改變世界果位行政總裁;結果發覺引狼入室,John Sculley同Steve Jobs發生權鬥,辦創人Steve Jobs被排擠黯然離開創辦Next,後來嘅事,大家都耳熟能詳。

呢位John Sculley先生,現年已經七十四歲,嚟咗新加坡創辦Inflexionpoint,從事IT分銷及投資,呢兩年印度及新加坡陸續收購IT分銷商。

蛇仔行政總裁林嘉豐,則以一億三千萬美金,舊年出售香港、新加坡、馬來西亞IT分銷業務畀JOS,然後JOS同蛇仔合併之後,就改名IXIX Distribution,而另一大分銷商就只剩低美資Ingram。

呢兩位先生原來相識多年,可能因為蛇仔以前做開蘋果分銷,如今兩位又有新搞作,合資成立SiS Inflexionpoint。第一單刁係收購蛇仔屬下專做流動產品分銷嘅Qool Labs,專門分銷平價手機。

新公司主要做收購再養大呢啲公司產品,性質上同風險投資差唔多,針對流動產品。不過,唔少生產流動設備廠商,集中深圳,呢家公司都可能嚟香港開檔。SiS主力物色收購對象,而Inflexionpoint就搵投資者金主,兼做歐美市場營銷。

復活節大假前,納指向下,騰訊同新浪相繼回購支持股價,新浪微博美國紐約納斯達克上市,初 段亦頂得好辛苦。美國傳媒唱淡中國,加上大淡友麥嘉華,又估計2014出現科技股災。雖然新興科技股受壓,但傳統科技股就向好,市場炒完概念後,重新睇番業績。



沒有留言:

發佈留言