八達通又要請人

高敏德(Kevin Goldmintz)辭任八達通行政總裁,Kevin上任只有短短七個月,話因事業有新發展,決定十二月初離任,可以話相當突然。高敏德加入支付卡行業超過廿三年,對香港好有感情,選擇留港工作,加入八達通接替張耀堂。

事實上,八達通搵CEO好困難,上次等好耐才搵到高敏德。離任後嘅真空期,就由技術總監甘志深暫代署理行政總裁。上月八達通與傳媒會面,高敏德仍然談論同淘寶合作。目前用八達通上淘寶比較繁複,計畫改善流動App,一次過完成流動支付過程,同PPS爭支付市場。高敏德亦好注重改善企業文化,激發創意,估唔到咁快就走人。

以往八達通都係習慣從Visa或Mastercard挖人。目前Visa港澳區係從匯豐過檔嘅陶偉邦(Thomas Tobin),銀行業經驗豐富。响Mastercard接任高敏德嘅葉安娜(Anna Yip),可能係熱門人選之一。呢位葉小姐係土生土長嘅香港人,中大畢業後,再取得牛津博士學位,曾服務麥肯錫超過十二年,熟悉支付卡技術,之後去新加坡做銀行,不過葉小姐接高敏德嘅位置,亦只係在位七個月。

前稱法國電訊嘅Orange,旗下提供綜合通訊解決方案嘅Orange Business Services委任Eric Haïssaguerre做大中華區總經理。呢位Haïssaguerre先生領導過澳洲、中國、印度等地區業務發展項目,又負責過區域內項目管理同諮詢服務,好熟悉雲服務及M2M,又或者物聯網等業務。