I記智慧城市

IBM一向推動利用IT建立智慧城市,用分析及預測技術改善城市管理。上星期介紹人工智慧超級電腦Chef Watson食譜嘅試食會,見到I記本港唯一嘅傑出工程師Samson Tai,原來渠亦有份為本港智慧城市出力;包括水務處的水管管理,通過多項數據預測每區爆水管機率,及早維修。多得I記技術,近年本港爆水管塞車情況少咗好多。

Samson亦有參予本港其他智慧城市,包括大數據分析改善交通嘅。其實各國政府都有用I記技術改善城市管理,讀Samson網上嘅博文,先知I記嘅「深藍」捉棋贏咗棋王,亦有「深雷」(Deep Thunder)用於預測天氣,可準確預測某個特定地區天氣。巴西里約熱內盧(Rio de Janeiro)就用「深雷」技術,預測各區降雨量,預測可推前到40小時前,準繩度達9成,又預告水浸黑點。其實,韓國及荷蘭都用I記作氣象用途。近年韓國經常受颱風吹襲,荷蘭就位於低窪,防澇好緊要。荷蘭治水技術全球聞名,尤其係鹿特丹市「水廣場」,充份利用水資源作不同用途,吸引全球專家訪問,美國亦聘請荷蘭專家治水。荷蘭利用I記技術,解決問題兼建立環保城市,今年獲得New Economy選為Smart City。

本港亦有位研究氣象學權威劉雅章教授,任教普林斯頓大學,經常回港講關於高精密天氣預測,提過美國唔少人以超級電腦,搞私人天氣預測業務,出售畀運動會或農業。但香港缺少類似需求,業餘愛好者比較多。

不過,I記推動用大數據,再以雲端超級電腦分析,可通過流動技術出售。劉教授亦係曾獲諾獎嘅IPCC(聯合國政府間氣候變化專門委員會)成員,話極端天氣愈來愈多,破壞力愈嚟愈大,但係雲運算力愈來愈普遍,加上氣象資料公開,私人天氣預測有機會成一門行業。