大道至簡

SAP用春秋老聃《道德經》「大道至簡」做主題,深圳搞SAP論壇。過去幾年,從2007年SAP中國老頂,從西曼(Klaus Zimmer)調職北亞區之後,李文俐、張烈生、蕭潔雲,歷任都唔長。直至前年調咗紀秉銘(Mark Gibbs)接任,先至穩定落嚟。紀秉銘調整人手,業績顯著改善。

紀秉銘在深圳,公佈2014年第三季成績表,軟件業務有雙位數增長,雲計算就有三位增長。舊年SAP向董事局直接匯報,可見重視中國市場。SAP執位後,Wilson Wong去咗HKPC,新老頂Michael Chue接手,集中南中國市場。

SAP集中商業軟件,亦有新技術如Hana同雲端應用,最近收購咗管理出差開銷嘅Concur,加上以前收購雲端採購方案Ariba,手上有唔少雲方案。但中國市場仍以商業軟件為主,一般嚟講SAP可大幅減少系統數目,改善資金管理,好受零售製造業歡迎。併購活動愈多,公司內部系統增加,愈有機會同SAP做整合。中國經濟面臨調整,未來有唔少併購案出現,業務整合後有可能上SAP,以「大道至簡」,另有深意。

美國科技股,上周派季度成績表。亞馬遜第三季業績令人失望,股價跌至52周新低。美元轉強,加上日本市場積弱,Fire手機反應麻麻,雖然AWS業務仍增長,市值一日蒸發百幾億美金。

咪記公佈業績,業績明顯改善;尤其Windows流動設備,9吋熒幕以下免收授權費後,市佔率增長,連自家品牌表現都回勇。Lumia手機上季買咗九百多萬部,加上OEM銷售,暫時遏止Android升勢,連帶PC跌勢似乎穩定落嚟;Surface Pro 3銷售強勁,收入達九億美金,終於有盈利。

另外,Windows服務器、SQL、System Center都有雙位數字增長,加上雲端Azure產品Enterprise Mobility Suite及Azure Active Directory市場受落,新老頂Satya Nadella策略果然奏效。