豬扒改撈稿

上星期到HP見到發哥，順便帶大家參觀新落成嘅Halo房。Halo係市場上最清晰逼真嘅視像會議系統，天涯毗鄰，好似响同一間房咁。以前HP自己都無，唯有由發哥帶隊參觀客仔嘅系統。以後方便咯，唔駛約來約去，上太古城總部19樓就有得睇。

上星期，最大新聞係HP收購網絡商3Com。3Com香港總部响HP附近，另一家全資附屬公司H3C就搬咗去銅鑼灣。發哥佢問3Com同埋H3C都賣交換機，兩者有乜唔同，當場考起。

用咗3Com嘅交換器都有十幾年，以前識3Com係因為網絡卡兼容性好勁，而家就因為有PoE嘅交換機好抵用，尤其用嚟接駁IP電話。兩隻品牌有乜唔同？真係要請教H3C嘅Penny兄。

HP買起3Com，同思科形勢更加對立。舊年思科推出刀鋒伺服器，Mark哥發威，HP力推Procurve，仲索性成間3Com買起。發哥話，諗極唔明點解思科做Intel伺服器，佢話交換器「孖展」幾好，有成六十幾巴仙。唔通好做唔做，瘦田有人爭？

交換器有冇咁多水位，真係唔多清楚。HP講明，買3Com係睇中H3C大陸做得好。以太網嘅交換器市場好飽和，豬扒亦推得鬼咁辛苦。講起豬扒，十月廿九日「撈稿」都改埋，駛唔少錢。新「撈稿」燒咗棵樹，字體由藍變黑，IP兩個字就剛好放在NETWORKS底下，真係幾含蓄，唔講唔明。

改「撈稿」當日，據講就係互聯網問世四十年。口痕友話十月廿九日，係咪互聯網四十周年就唔清楚。十月廿八日係紐約股市大崩潰八十周年，就好多人知。一九二九年黑色星期二，杜指跌咗十二巴仙，美國大蕭條亦隨之開始。

光纖管道交換器廠商Brocade，剛委任嘉靈電子做本港分銷，搞儲存系統嘅交換器，根本上仲係Brocade嘅天下。