Fortinet 股價爆上

上星期Fortinet（FTNT）終於上咗市，17號納斯達克掛牌，首日比招股價爆上三成半，成為今年上市升幅嘅新股王，跟住股價維持响 17蚊美金水平，唔算霎眼嬌。Fortinet上市一波數折，今次集資額係一億五千幾萬美記，市場人士話訂價偏低，所以升得急。

一般嚟講，科技公司最緊要有創意，Fortinet嘅創意又真係好勁，除咗出UTM防毒、網頁過濾、反垃圾電郵、防入侵，上年連加速都做埋。最近，甚至推出10Gbps高速交換機，專攻服務供應商。不過，Fortinet市場集中教育機構同埋中小企，大機構好似依然未受落UTM。

創辦人兼CEO謝青今年曾返過大陸，媒體將Fortinet捧成下一家Netscreen（謝青係創辦人之一）。Fortinet响二千年創辦，花咗九年先上市，翌日仲响華爾街日報賣全版廣告。謝青上市當日到Nasdaq敲開市鐘（其實正確講應該係「㩒鐘」），真人原來高大威猛（以前曾經係職業排球隊員），加上股價大勇，真係威威。

上星期戴爾派成績表，第三季盈利下跌超過五成四，收入更有雙位數字下跌。戴爾嘅客仔之中有八成係企業客戶，消費產品唔係佢哋強項，受金融海嘯打擊特別大。不過，另一家日本電腦生產商富士通，今個星期推LifeBook U4010，連日本設計師都嚟埋。日本人設計消費電子好叻，Windows 7支援多點觸控式屏幕，理論上應該好多新意思。

另一則新聞，就係Google終於推出Chrome OS，亦係標榜夠快。Android手機大熱，唔知幾時到Chrome，遲啲可能輪到PC廠，又趁勢推一輪Chrome機應市。