思科唔吼Polycom？

思科想買起Tandberg嘅三十億美金大刁，因為响奧斯陸投票，有24%股東反對出現變數。挪威好民主，收購至少要獲九成股東通過，所以好難講幾大機會成事。

問題係思科嘅出價，已經較Tandberg响收購消息泄露前，即係七月十五號，高咗近四成。 有口痕友話，思科買唔成Tandberg，不如追Polycom套戥。睇返股價表現，Polycom七月廿五號確由二十蚊美金，隨Tangberg收購消息爆光，造好一輪，升上突破二十八蚊，然後回落到近日低過二十二蚊徘徊。

點解市場以為，思科即使買唔成Tandberg，都唔會吼Polycom？ 首先，Polycom除咗VC，亦有做話音，包括IP PBX同電話機，業務上同思科有重疊。此外，VC技術上可能仍係Tandberg比較好，兩家公司性質唔一樣。思科前景亦好困難，IP電話成行成市，路由同交換器後有追兵，自己响視像市場又係新丁，所以想重槌買起Tandberg。不過瘦田耕開有人爭，講唔定仲有對手加入爭奪。 

視像技術除咗可以用在開會議，亦可用在監察保安，思科都有生產視像鏡頭，聽講澳門某家賭場就用咗佢哋鏡頭。監視鏡頭隨街都係，地產項目多錢駛，分一杯羹都唔得掂。 今個星期，深圳舉行「中國國際社會公共安全產品博覽會」，好多公司從香港上去擺檔，據Tyco嘅Chris話，雖然價錢超貴，竟然仍有一千參展商，更有唔少國際買家，展期連續四日，已經係世界最大嘅同類展覽，真係犀利。