上堂反貪污

收到HP電郵話最後通牒，如果唔响年底之前，參加法律及法規遵從計畫，就分分鐘被踼出局，拍乸地位不保。

拍乸要指定日期內上堂，費用盛惠一百二十美金。課程由一家叫美國Interactive Integrity嘅公司負責，除咗講法規遵從之外，仲有反貪污，好似幾認真。學費唔算貴，HP亦可以話係第一個要求拍乸上堂嘅科技公司。不過單靠上堂，可唔可以反貪？真係唔清楚。

呢個課程只係網上完成，大部分拍乸自己俾錢，少部分由HP負擔。不過，如果教育可以杜絕貪污，相信都唔會有咁多社會問題發生。其實，一般賣HP電腦硬件，邊際利潤好微薄，貪污始終都係成本一部分。除非投標好大嘅破席，客仔可能唔好意思收回佣。

話說回頭， 廉潔奉公當然最好，憑實力競爭，先至最公平。希望呢啲咁有意義嘅教育工作，唔好變咗擾民就好嘞。