思科收購Tandberg後……

上星期，思科收購Tandberg終於塵埃落定，思科收購Tandberg，由三十億美金，結果加到上三十四億，Tandberg股東真係飲得杯落。

近期VC開始流行桌面視像系統，即係好似科幻片，檯頭一部視像電話，馬上可以面對面傾偈。不過桌面視像會議嘅用家，一般都係大老闆或者高級行政人員，放响大班檯一定要好品味；最近Tandberg靚女經理Priscilla曾經介紹個人視像新產品，就係E20視像電話；介面簡潔，望落好似B&O，北歐風格設計。唔怪得思科要買起Tandberg。

講起Tandberg，另一位靚女經理Jamie亦就快放產假，做Marcom嘅Venus亦有喜。瑞安中心風水唔止旺財，連丁都旺埋。

Tandberg响傳統VC市場好掂，不過講到個人電腦桌面嘅VC方案，佢哋開發嘅MOVI系統，就同另一家標榜H.264/SVC新興視像傳送標準嘅廠家 Vidyo，殺到難分難解。

Vidyo响香港由CyberWorld做分銷，聽講Jansen推得好積極。Tandberg嘅MOVI暫時唔支援Mac平台，蘋果機又愈嚟愈多。如果買家想同時支援PC同埋Mac，咁MOVI就好頭痛。聽講MOVI要到2010年頭，先至支援Mac，目前打入教育市場好困難（因為大學裡面Mac機特別多）。

最近，咪記同Tandberg公佈MOVI在OSC平台合作，又支援AD目錄整合，對佢哋競爭好有利，因為咪記AD市場始終好大。不過而家Tandberg變咗思科，同咪記响Presence技術同UC市場，又係打對台，無理由抬石頭打自己隻腳。

不過，其實舊年思科推出HD嘅桌面視像系統，就係OEM咗Vidyo產品，並整合响UCS內。今年思科方案日亦有介紹呢套系統，昔日合作伙伴即刻變競爭對手。思科買起Tandberg，MOVI到時一定支援思科嘅UCS。

以後思科同Vidyo，關係會發展成點？Polycom咪記會唔會愈行愈埋？咪記同思科，會唔會交換合作拍乸？真係要下回分解。