迷失HP

上星期HP出報紙廣告，澄清分拆PSG好處，不過突然叫停TouchPad及WebOS設備發展，又話分拆PSG，顯然已產生混亂，分銷商同埋客戶不知所措。但HP又表明繼續發展WebOS，方向係點？亦無人知。

當年I記出售PC，明知市場一定流言蜚語，趁機抽水，馬上請分析師同記者上京，由老頂Henry Chow交待細節，唔俾市場估吓估吓，可謂謀定後動。壯士斷臂係好事，不過要識得止血…

HP一向好似幾家獨立公司咁運作，打印部門IPG尤其獨立，部門各自修行，近年TS亦有趨勢獨立，一直有基金鼓吹IPG獨立分拆上市。三部門中，IPG算係皇帝女，否則分拆村長個女，又點有人吼？

上星期HP最多人討論，係有關Felix See離開TradeLink(0536)。Felix係前香港中國區老頂孫振耀嘅愛將，出任過香港區總經理，無耐赴台灣整頓，之後再加入貿易通，鋪屎年薪四百萬，TradeLink公佈今年上半年，純利二千八百七十萬，總收入比舊年跌百分之四點五，同期僱員成本約四千四百幾萬，人工開支平穩，折舊就升得快，可能早幾年積極投資，收入就無同步咁上升，大陸投資更麻麻哋，近年就唯有積極削減成本。

TradeLink一直係HP嘅舊客仔，請Felix理所當然。Felix一直睇HP銷售部門，科技服務相當熟悉，相信負責條數，唔夠一年離任，令人意外。

TradeLink人數唔多，只有二百七十位僱員，同HP相差好遠。如此類推，以近年好興嘅Profit per employee比例計算，即每位TradeLink員工賺取純利，每年大約係二十萬七千蚊港紙，相比全世界最高市值嘅蘋果電腦，每名員工全年搵四十一萬蚊左右，不過蘋果計嘅係美金，而HP只有二萬八千美金，比起TradeLink，反而唔係相差好遠。