教大笨象跳舞

上星期尾，HP終於宣佈新人事任命，改由前eBay老頂Meg Whitman領導。不過eBay係一家新進Dotcom，因食正條水，扶搖直上。HP則係一家業務極度龐複，非常成熟嘅IT企業，只係極待轉型求變。Whitman究竟識唔識教大笨象跳舞？

當年I記董事會，一再請求從未具IT經驗嘅Louis Gerstner出任老頂，外行領導內行，大刀闊斧改革，結果I記浴火重生。當年負責為I記搵阿頭之Jim Burke，果然慧眼識英雄。Gerstner引以為傲一件事，就係一上任，就中止I記嘅解體計畫。事後憶述，此乃其職業生涯之中，重要嘅關頭上之最正確決定。

解體一家公司，搞下收購合併，只算財技唔係管理。Gerstner選擇出售非核心資產，改變企業形象、整頓管理文化，同埋釐清業務走向，一錘定音。聽講Gerstner寫書，不假手於人，所以額外傳神。

從政不成嘅Whitman，可唔可以改寫HP？且拭目以待。Whitman同埋董事會執行主席Ray Lane向拍乸發信，話未來嘅任務係「unlocking the value trapped in information is the single largest opportunity」，原來釋放蘊藏資訊中嘅價值，係HP業務最大機遇，點解聽落有啲似SAS嘅宣傳口吻？

HP以銷售硬件為主；上季度業績，軟件佔營業額百分之二，以幾年來收購金額，單係Mercury動用四十五億美金，可謂不成比例。口痕友話，HP落實賣PSG，要賣得好價，今季一定砌靚條數，Kelvin Kong有排煩，此刻正係「Tablet當道，Notebook難做」之秋，PC好又好睇經濟周期，亦好靠咪記推新OS；以Windows 8進度，可能等多至少三至四Q。選擇最唔好時機話出售PSG，可謂死有餘辜。

講開HP軟件部，請咗唔少 SAP舊人；包括亞太及日本副總裁李文俐，佢嘅上司銷售服務及支援部高級副總裁Hans-Peter Klaey，亦係SAP老將。將軍一去，樹倒猢猻會唔會散？