智能手機市場

今個星期，又係創新科技署每年一次搞嘅「創新科技嘉年華」，禮拜六去沙田科學園開幕，主禮包括咗蘇錦樑同埋Liz Tse等一眾高官，但主要節目都响科學園舉行，除非真係好有興趣，唔知邊位會長途跋涉參加。

科技園亦公布咗幾家佢哋培育嘅科技公司，開發流動平台軟件打入國際市場，相當威水；包括咗太陽魚、思方科技、Oursky。太陽魚專攻iOS平台上嘅RPG遊戲，思方就做Android平台嘅質素監控程式，Oursky就針對Android流動裝置多數快門較慢，唔方便動態攝影，所以推出咗ActionSnap，可作連環快拍，已經俾人單撈咗百幾萬次。

一家做iOS，兩家專做Android平台，說明咗一個事實，就係流動平台，如今只係兩個系統之爭。Android手機供應充裕，選擇亦多，增長又較快。蘋果嘅供應鍵顯然出現咗問題，眼白白見市場俾Android侵蝕。

上星期，Google推出新網站，俾大家分析不同國家智能手機用戶習慣，可自行建立圖表，比較不同國家用戶情況，相當有趣。
http://www.ourmobileplanet.com/
按Google統計，以智能手機滲透率，日本竟然只有百分之六，可謂低得離奇。南韓亦只有百分之二十七，香港只有三成半人用智能手機，而新加坡就有六成幾人用智能手機，滲透率冠絕亞洲。

無獨有偶，HP委任Meg Whitman接任ceo之後，上星期I記亦宣佈一百年以嚟首位嘅女性行政總裁Virginia Rometty，呢位Virginia已經服務I記三十年，舊年I記宣佈截至二Ｏ一五年，會用大約二百億美金收購，認真犀利。I記股價走勢唔錯，已逐步回上番190蚊美金水平。