速遞員之死

HP嘅PSG有人事變動，十一月老頂Kevin Kong離任，唔知又會唔會好似IPG咁，從外邊空降。世事輪流轉，以前IPG老頂Alice Ong，家就去咗聯想賣個人電腦，可能腳頭好，業績仲屢創新高，柳傳志就功成身退，再次離任，對得住股東有餘。

過去兩年，HP推薄客戶，但係蘋果加Android平板崛起，市場轉向流動運算，跟住WebOS又難產，終於尾大不掉，PSG賣唔出，只有面臨重組命運。上月，聯想嘅以Android平台推出ThinkPad Tablet，聽聞反應唔錯，用咗NVIDIA處理器 Tegra，顯示效果當然靚絕。

PC嘅年代是否結束好難講，不過上星期咪記決定殺死研發中平板作業系統「速遞員」（Courier），令人聯想HP嘅WebOS出師未捷，傳聞話Courier死因，係唔支援Outlook電郵，實際上可能係風險太高，WebOS前車可鑑，咪記唔會推出新嘅平板作業系統，推動平板電腦市場，仍要靠只聞樓梯嘅Windows 8。

據講，咪記要等到二Ｏ一二年，先推出專為平板而設計嘅 8仔。如果HP想進入平板市場，Android暫時係唯一選擇──如果唔怕得罪咪記嘅話。不過HP嘅IPG响美國已推出一部叫Photosmart eStation嘅打印機，機隨附送Android平板一部，用嚟控制部打印機操作，兼雲端打印。點解連eStation唔用收購返嚟WebOS？但買打印機附送平板，大雞兩味，確係唔錯。
　　
最近活躍招兵買馬嘅CA終於有新港台 VP，就係從香港咪記EPG過檔嘅Benjamin Kwok，佢以前亦做過太陽及I記。另一家做SAN switch嘅Brocade亦四圍搵人，聽講柯化唔錯。

明晚係Macroview高威電訊嘅二十周年慶祝酒會，呢間公司專注發展技術，成為本地IT界一股動力，值得尊重。