科技變財技

剛接Akamai公佈，話委任楊欽銘(Steven Yang)為北亞區副總裁，Steven Yang從Barracuda過檔，以前係亞太區副總裁。今初Akamai已經聘請咗Pacnet嘅Alice Ting過檔任香港及台灣區域經理，Steven Yang以前曾做過Brocade，又曾做過咪記，同响Axis嘅北亞區副總裁Fan Look好熟。Fan Look好早就做咪記市務總監，真係少年時意，亦做過Brocade，但最長情仍係目前做緊嘅IP Surveillance公司Axis，可見冷門產品亦可以好好做。 

講起Barracuda，呢家公司近年產品多蘿蘿，香港除咗DataWorld，亦委任咗Westcon做分銷。除咗最傳統反垃圾郵件同防毒，又收購咗應用防火牆，挑戰Imperva，亦有出第二代防火牆，挑戰Fortigate或Palo Alto。不過Barracuda仍未上市，舊年就委任從EMC過檔嘅William Jenkins任行政總裁。

但係Barracuda响保安防火牆產品，始終唔算係主流，應用防火牆亦未係Imperva競爭對手，究竟今年上唔上市？Steven Yang仲未上市就鬆人，亦真耐人尋味。

上星期另一宗新聞，係蘋果發行一百七十億美元債項，為有史以來最大公司發債，籌集資金，預備向股東派發嘅五百五十億美元及回收股份。蘋果海外現金，多達一千零二十三億美金，如果調回美國就須要繳稅，所以發行債券避稅，海外資產作為日後找數之用。

不過，蘋果集資其中一百四十億係定息，而年期則不等，融資利息極低。上星期，咪記亦集資咗一百九十五億美金，顯禦美息已跌至谷底，所以現時唔借就笨，屆時美息回升再回購債項，蘋果再賺一筆，從科技到財技，最緊要股東開心。