Linkedin 十年

如果話IT人上嘅網站，Linkedin可能係搵工最佳途徑，令IT獵頭工作簡單咗唔少，只要開個Linkedin戶口，條件啱就有獵頭自動上門，Linkedin可謂全球最 大人材市場。上星期先知Linkedin十歲，應該要恭喜一下。

2003年中，Linkedin創辦一個月，只得四千五百名用戶。但今日亞太區Linkedin有四千萬名用戶，全球更多達二億二千五百萬名用戶，十年增長五萬倍。唔少專業人士經常登錄，利用Linkedin交流同行家保持聯繫，使用頻率極高。

據美國麻省大學調查顯示，美國迅速成長嘅企業，唔少嘅社交平台都係利用Linkedin，而且擅用社交平台嘅企業，往往盈利增長較為快，以商業應用而言，Linkedin已經超越飛卜；另一項發現係愈來愈多CEO做咗博客，利用Blogging同客戶及投資者保持溝通，少咗利用youtube嚟做企業通訊。

現代商業世界以快打慢，社交網絡可作為聯繫企業伙伴，宣傳同埋客戶溝通。但如果話飛卜係B2C工具，Linkedin就係B2B。

上幾期講到，Fireeye係本年最有希望上市公司。上星期沙地一家銀行，被黑客入侵，响世界各地廿多個國家偽造提款卡，偷咗五百萬美金，證明黑客可以係通天神偷。聽講話Fireeye本地發覺唔少公司被入侵，好似X光一樣見到黑客在企業內活動，搞到IT保安無覺好瞓，如今發生駭人驚聞大案，相信Fireeye可以加快上市。