2013年5月29日星期三

三白金認證環保酒店

上星期去Autodesk發佈會,見到總監Wendy Lee,又發新卡片,原來係轉咗新撈稿,黑白變彩色。發佈會最精彩部份竟然係客仔有利建築,講點用BIM軟件Revit同工程智慧,打造一家得到全球獲最多環保白金認證嘅酒店。呢家酒店位於上環嘅Holiday Inn Express,係全球首個獲得三個白金認證(美國LEED 認證、香港BEAM Plus認證、新加坡建築及建造局Green Mark白金級認證),認真巴閉。有利集團執行董事Rosanna Wong講起有利屬下E&M獨創嘅環保技術,如數家珍,證明香港工程師好有創意。

單記前老頂Michael Chue離開去咗P仔solutions後,香港澳門總經理一直懸空,上星期終於公佈。一如傳聞,由CA嘅Benjamin Kwok郭顯達接手香港澳門業務,Benjamin之前係CA港台副總裁,產品線同單記好接近。

Benjamin以前做過咪記拍乸部門,又做過太陽香港區董事總經理,2011年底先加入CA。不過渠最長時間係做IBM。單記今年初聘任嘅Chris Lin大中華總裁, 兩人先後做過咪記;無獨有偶Chris Lin以前亦做過太陽。

上星期又見久別嘅Syd Wong,離開思科兩年之後,又再返去思科幫巴巴拉,Syd照顧思科大客仔。Syd Wong係香港做VoIP嘅老手,想當年北電係第一位向小弟介紹VoIP,知渠相當專業。Syd後來轉行,但最終都係回歸老本行。人緣唔錯,巴巴拉都深慶得人。

沒有留言:

發佈留言