老狗新招

上星期講開，唔少金融機構評估火眼緊Fireeye。上星期，火眼公佈本港部份爭取普選人士，受到木馬程式攻擊，事關一封電郵有關四月初，宣傳城市大學內「真普選聯盟」舉辦「普選轉捩點：爭普選運動的關鍵」政制研討會，邀請函內附件 Excel檔案，竟暗藏玄機，有設計極為精巧嘅木馬程式， 利用Office漏洞植入，呢個程式即使有防毒程式亦好難發現，惡意程式首先植入記憶，控制機器再與外部C&C服務器聯絡，然後改變攻擊目標嘅設定，控制接收郵件者電腦。

呢個木馬極難察覺，Fireeye無講明病毒由乜人開發，不過幾乎可對號入座；中美之間網絡戰，去到外交層次。Fireeye以Old dog new trick來形容呢個木馬攻擊，老外通常話老狗學唔識新把戲（You can’t teach an old dog new tricks），呢句話老狗竟學識新招，即係話小戲法騙不過明（火）眼人，仲罵對方係老狗。網絡戰勝負難分，口水戰似乎美方佔先。火眼其中一位大客仔，係美國國防部，破解間諜程式特別在行。今個月底Fireeye全球銷售總監Jeff Williams訪港，屆時應該有唔少人有興趣同渠傾偈。

上星期講開Arista Networks，利用所以Merchant Silicon工業標準晶片，而唔用專屬ASIC晶片，開發出超級快速嘅Arista 7500系列交換器，而上星期賭城Interop，Arista 7500系列嘅交換器贏咗大獎，原因係Arista 7500支援嘅100gigabits埠位最多（可以多達96個），管理超過10萬台服務器，超過百萬台虛擬機器，比市場上相同嘅100gigabits交換器，價錢亦低好多，以100gigabits每埠位計只係一萬美金，比目前同速度產品平咗十倍。因為Arista用工業標準晶片，硬件開發成本低好多，對於其他對手構成好大壓力。