2013年11月27日星期三

營運商國際服務轉型

上星期,接中移動新聞稿發表VoIP應用Jego,有iOS及Android版本。國內或本港中國移動手機用戶,即使身處海外,將號碼同Jego綁定,可免費接聽 VoIP來電,先決條件當然係有海外漫遊數據或無線上網。

海外用戶亦可通過Jego租用中國移動國內或本港手機號碼,任何地方免費接聽來電,未來中移動亦會提供綁定不同國家嘅號碼,只要認購號碼,就可隨時利用VoIP接聽來電。

Jego客戶亦可低費撥打全球電話,亦可與其他Jego同戶發送文字訊息、圖片、撥打語音同視像通話。

大家聽落,上述功能似曾相識,其實即係Skype嘅 in及out功能。但中國移動收費,比Skype低得多。流動營運商自行推出VoIP,就有啲離奇,好似搬石頭砸自己腳。

上季中移動公佈業績倒退,好大理由係語音服務下滑,因WeChat高速成長,短信及海外語音服務萎縮,連營運商自己都推VoIP,顯示國外漫遊可有可無,以後大家只要有中國移動號碼,有數據就去到邊聽到邊,唔少人都要嚟本港做生意,號碼唔少都係訪客持有,呢個服務對於到訪中港兩地嘅人好有吸引力。

通訊局上周宣佈收回部分3G頻譜重新拍賣,中移動志在必得,加上Jego服務,吸引更多訪港用戶,轉用中移動號碼或數據。其他營運商唔推類似VoIP服務,遲早流失國際用戶。但本港幾家營運商,缺乏中移動咁嘅營運基礎,亦好難同中移動競爭。

今年九月,中國已經發咗接入認證畀iPhone,而iPhone 5s/5c又支援TD-LTE,下月iPhone賣成點,相信中移動好緊張,以中移動影響力,加上假期臨近送禮忙,聞聖誕鐘聲,下月蘋果股價,分分鐘炒上。

沒有留言:

發佈留言