達科入領導者象限

上期講PY退休，Horace Chow頂上。究竟PY係咪真正退休？响DD達科見到老頂Francis Pang，原來亦係PY舊同事，响HP收購Compaq之後馬上離開。HP收購後紅藍之爭，一直時有所聞。當年Carly Fiorina決定係咪正確，至今莫衷一是。美國CEO為谷營業額，作大規模收購，短期沖喜，長遠管治，就好頭痛。

科技界併購，日日新鮮。舊年達科俾NTT收購。據彭總話，NTT收購前後想咗好多年，結果等完又等，本來前年成事，後來又再等一年，先至落槌，結果畀多十億美金。收購後達科運作獨立，同本港NTT彼此只係夥伴關係。西方同日本企業文化落差多大，日本企業做規畫，可長達一世紀，非常謹慎。達科嘅雲產品，剛剛入咗Gartner嘅Magic Quadrant領導者象限，真係恭喜。

除咗達科，前年NTT亦收咗Integralis，呢家歐洲公司一直做保安諮詢，响歐洲做得唔錯，NTT收購後積極打入亞洲，招兵買馬，最近終於亦請咗本地孖屐亭。Integralis一直有錢賺，NTT收購後Integralis運作亦係獨立，月尾行政總裁Simon Church訪港，講流動保安。香港流動電話滲透率全球第三高，Integralis客戶又以金融銀行為主，本港市場潛力大，老頂亦來港訪問。

上星期，咪記同谷歌盈利下降，河床公佈第三季盈利又創紀錄。但係陸續開始有IT公司裁員，不過本港裁員人員有限。