2012年12月12日星期三

三星炒米粉

Q4過咗大半,破席拖得就拖。反正又到聖誕,有乜明年先傾。

明年活動,較矚目係一月份SharePoint Conference,入場費三百大洋一位,聖誕前買一送一,有機票抽獎,明年一月十四皇后大道中Cliftons舉行。上次SPC選油街海逸君綽,近排酒店好貴,轉咗去Cliftons慳番筆。

每年新加坡電訊SingTel响香港搞CIO Day,今年升級做i.luminate。i.luminate係SingTel每年响新加坡嘅大型活動,今年搬嚟可見業務唔錯。

上星期,防火牆Palo Alto Networks終於公佈上市後首季業績,截至今年十月底,首季銷售額升五成到八千三百八十萬美金。股價應聲向下,跌至七月份上市後最低位,跌破五十美金心理關口,雖然較上市價仲有八蚊水位。Palo Alto銷售升幅比預期差,預期保安市場放緩,其他對手牛皮。

流動市場則仍熱炒,做手機番身嘅三星,市值升破二百億美金大關,係南韓最值錢公司。雖然同蘋果仲有距離,已經有好啟示價值。

聖誕節近,手機趕上市。國產平價版四核華為Ascend D1抵港,係用華為開發晶片。另一隻QualcommAPQ8064四核LG Nexus 4 E960亦殺到,行1.5 GHz Krait,流暢度高。國內另一大熱叫小米2,亦用APQ8064,據講發燒級,米粉愈來愈多,預售後斷貨,被批非法集資。據Qualcomm中人話,小米技術含量高,比韓國貨唔失禮,價錢平一半,產量趕唔上。雖然市場疲弱,今年中小米仍可向VC集資兩億幾美金,明年上市,米粉一定有得炒。

沒有留言:

發佈留言