幾百蚊PC年代降臨

講話Qualcomm市值超英（特爾），其他ARM廠商又點？去開鴨記都知，國內類似瑞芯Rockchip，推出唔少ARM以cortex 通用處理器嘅通訊產品，又令平板價錢下滑，Android產品款式之繁多，幾乎超乎想像。最近包括咗手指Android Dongle Mini PC，接上電視或芒HDMI Port，用嚟做Smart TV，雙核只賣幾百蚊，仲包遙控器，有Wi-Fi功能，上網兼打機、又可播片，加埋鍵盤滑鼠，當一般PC用。

Google嘅廣東話語音搜尋亦好準確，語音搜尋加入Google TV，去搵「大太監」，將來只要向遙控口噏噏，呢點更有排追。

雖然虛擬化及雲運算，英特爾x86係最大得益者。x86用戶終端則可能被ARM架構取代，而Android則取代Windows，從應用增長迅速已不問可知，終結多年Wintel壟斷終端格局。兩個A字改變世界，加埋全球最大價格破壞者幫拖，Wintel大勢已去，瓜多過菜。

改變流動算運另一個A字，就叫Apple，iPhone曾挽救唔少電訊商，以往蘋果居高臨下，鼻大過靴，同電訊商關係一般。如今Android高端手機愈出愈勁，大家樂得紛紛轉軚。

Android成功，其中一項殺著係地圖，呢個連阿水都知，除Streetview及乘搭不同交通工具指示，踩單車途徑，連行山都包埋，又可虛擬進入建築參觀。Google Map足夠打殘對手，地圖又係流動設備最重要應用之一。上星期，蘋果繼續有人頭落地，再炒負責地圖嘅主管Richard Williamson，Tim Cook四出同不同數碼地圖供應商密斟，遲啲肯定有重大收購，話唔定收埋諾記，一來可打擊咪記，二來諾記已花唔少錢開發地圖，止下咳先。

但iPhone神話，真可能同Steve Jobs一齊，及身而絕。