英特爾絕地反擊

上星期蘋果股價大跌，可能下試五百蚊美金心理水平。iPhone 5中國推出，反應一般。中國係三星大本營，一下子畀iPhone突襲成功。如今Android手機越出越靚，iPhone乏善足陳，果粉熱情不再，亦可理解。

上期講，國產手機唔失禮，Qualcomm同唔少國內廠商合作，因為唔少Google服務國內根本用唔到，國產手機切合國情，針對例如驣訊同埋百度，上星期Qualcomm宣佈支援國內搜尋引擎百度搞百度雲，結合Qualcomm Design Reference（QDR），支援聯想生產樂風手機，亦即係話，高通幫埋手機廠產商做埋系統開發，預裝應用，只要用Snapdragon晶片，馬上可以結合百度雲在智能手機內。

上星期，英特爾响三藩市宣佈，正式推出22nm製程技術（目前主流係28nm）嘅Atom晶片，加入Tri-Gate多門控制示技術，大幅縮細體積同減少能耗，而且性能好勁，進軍手機及平板，英特爾加快SoC開發，同ARM砌過，優勢係英特爾有晶圓廠，唔好似ARM廠家都係Fabless，靠類似「台積電」代工。Atom可唔可以起死回生？Atom比一般ARM晶片貴成倍，加上Qualcomm夥拍唔少國內手機廠商，成本上好大優勢。英特爾响流動市場捲土重來，暫時唔樂觀。

北京見到Autodesk全球副總裁林星華，三個月前剛從O記轉職，之前做O 記大中華區技術產品事業部，即係System，住咗北京成十五年，見到記者仍然唔少問起O記，渠話中國大陸佔全球ExaData營業額達11%，搶咗I記唔少生意，不過Autodesk唔做硬件，林總點樣做靚盤數，真係拭目以待。