科技股轉型

思科上星期公布業績，話前景不明朗，股價急挫。思科傷風，科技股打乞嚏，紛紛下挫。不久前，豬扒老頂Kevin Johnson宣佈辭職，顯示網絡設備生意，的確唔易做。

思科剛宣佈以二十七億美金，收購Sourcefire，加強保安產品陣容，跟住又裁員四千，老頂John Chambers話集中資源，思科保安產品一直落後。但未來應該係SDN同虛擬化嘅天下，思科除咗要收購保安，亦要加強虛擬化，但有關收購至今規模有限。豬扒亦努力想轉型，今年Kick off就大談SDN，不過似乎成效亦好限，雖然始終快過思科。

而SDN之中，VMware收購Nicira後，獨立嘅Big Switch又剛英特爾及高盛入股，另一家由唔少思科前行政人員組成嘅Arista，舊年連負責思科SDN嘅計劃（OpenPK計劃）負責人Tom Black，都跳船過咗 Arista。其他好似 Embrane及Plexxi等較細SDN公司，亦受投資者追捧。但類似專門出售網絡器材嘅公司要轉型成功，其實有一定難度。因為SDN以軟件為主，對於傳統業務有一定衝擊。

究意SDN有無前途？最近Big Switch同戴爾成功响中國，為「央視-索福瑞媒介研究公司」（CSM media research）建立SDN，大量傳媒報導。戴爾在中國業務做得唔錯，又無乜傳統包袱，終於做到第一個SDN案例。最近戴爾希望私有化，唔想受到上市地位影響，加快業務轉型，發展數據中心業務，可惜受唔少障礙，不過科技股再跌吓，Michael Dell嘅大計，又有多啲希望成功。