2013年8月28日星期三

美國科技股當黑

美國科技股流年不利,思科公佈業績後急挫,然後HP宣佈第三季業績後宣佈重組,全線業績無乜起色。上星期,納市更加因技術問題一度停市。反而咪記因為Steve Ballmer宣佈一年內退休,股價升近一成,有啲諷刺。

另一家前景堪虞嘅公司叫黑莓,智能手機市場鉅變,業務潰不成軍。

翻開《紐約時報》Floyd Norris專欄, 評論黑莓風光時點樣駛錢,華。早前黑莓宣佈,聘請銀行評估賣盤,已經唔係新聞,黑莓無力挽狂瀾,似乎已成定局。不過Norris話,回顧當日,黑莓業務如日中天,駛錢方法相當離奇,值得投資科技股人士關注。

多年以來,黑莓向股東分發三十五億美金,但唔係以派息回敬股東,而係市場上回購股份。如果要從黑莓賺錢,唯一方法係炒賣,仲要識高價出貨。點解美國科技股不願派息?反而不斷回購?更離奇係,大部分嘅回購,發生於介乎2008至2009年進行。當時黑莓股價,正處於歷史高位。

雖然,當時黑莓手頭現金大把。但高價位回購股份,畢竟奇怪。Norris解釋,行政人員持有大量認股權證,回購股份有利刺激股價向上,但派息就對股價影響有限,所以唔派息而回購。故此想投資黑莓搵錢,長期持有嘅人一定係笨蛋。

美國科技公司回購股份,有時出於行政人員私心,目的係有利高價行使認股權證,黑莓通過認股權證,只收回三億六千五萬美金左右。雖然話回購股份唔影響一時盈利表現,但長遠現金資源緊絀,無法在業務倒退時,再用多啲錢進行收購或開發研究,導致無法翻身。

沒有留言:

發佈留言