流動手機制式大戰

政府對上一周終於公佈明年拍賣流動電視頻道，其中一條屬於「黃金頻譜」亦即UTF內嘅頻道。電盈曾經試驗過幾乎所有流動電視制式，包括MediaFLO同埋DVB-H，唔怪得最近Qualcomm經常搵人出嚟唱好MediaFLO。

流動電視以廣播模式响手機上以多點播放，諾基亞在歐洲力推DVB-H，但成效至今麻麻，而且設置網絡成本唔平，目前嘅投資意慾，真係生不逢時。不過，流動電視係諾基亞與Qualcomm之爭，前者响亞洲手機市場惡哂，不過Qualcomm嘅Snapdragon功能好強大，有年唔少智能電話，包括WM、Linux同埋Android，包括好多韓國同台灣手機，都會用Snapdragon，所以好戲連場。

目前支援DVB-H嘅手機唔算多，其中一隻係賣成六千幾銀嘅諾基亞N96，但到流動電視推出，市面上嘅選擇仲可能好多。

另一家歐洲做手機起家嘅瑞典愛立信，手機俾咗新力，目前集中做基礎設施，前年年尾收購咗美國Redback，最近佢哋SM480以太網傳送方案獲《亞洲電訊》「全年最佳網絡創新產品」獎項。SM480速度極高，可用嚟簡化電訊商嘅網絡結構，整合固定同埋流動網絡，亦有足夠能力應付三合一流動網絡嘅需求。Redback崛起，加上性價比好啲，令豬扒在中國北方寬頻市場失咗唔少存取伺服器（BAS）市場。

BAS市場難分難解，SM480又在整合層，令豬扒好頭痛，加埋國內嘅華為，明年電訊級以太網市場好活躍。不過講起Redback，呢間公司曾經响二ＯＯ三年申請破產，後來愛立信獨具慧眼，結果收個滿堂紅。