HP推ProCurve

上星期去HP，又推新鐳射打印機，見到Terrence Chan介紹新一代CM3520彩色機，旁邊人頭湧湧，平日介紹新產品，邊有咁多自己人？原來今次係Terence最後一次為HP鐳射打印機做介紹，佢今個星期離開服務十年嘅HP，新舊交接（定係送別？），所以特別多人。Terrence好熟鐳射打印機行頭，見多識廣，唔知搵乜人代佢？

HP嘅IPG部門今年變咗走馬燈，而做BD嘅Sandy又遲啲兼埋做孖屐享，可能遲啲做MFP嘅Cindy去生仔，可以兩手準備。

HP最近最熱鬧嘅話題係ProCurve，呢個品牌係好耐之前買番嚟HP嘅交換器，以前HP嘅銷售賣ProCurve無著數，反而賣思科就反而有佣金，所以係二奶仔命。Mark哥上場後撥亂反正，叫手下全力推ProCurve，重賞之下，結果全年營業額從幾億發展至有成十億美金，香港仲啱啱請咗位新同事，而家全歸TSG管，應該好快有公佈。

Riverbed嘅Bill Ting話最近開始同HP嘅ProCurve有合作，ProCurve係終生保養，價錢唔貴，加上HP品牌，唔少網絡經理都開始考慮。阿J一向用3Com（而家叫華3），亦係終生保養，但通常交換器未壞，已經換咗新款，所以從未享受「終生」嘅好處。

講起思科，雖然話Catalyst仍佔佢哋唔少生意，但近年焦點已經轉咗做電話、無線網絡以及一體化通訊，今年主力打中小企市場，所以早排請咗以前响HP專負責中小企嘅Wesley So去助陣。

上星期，香港理工大學，思科以及佢哋本港首個一體化通訊嘅大師傅高威電訊，開咗一個「創新企業網絡實驗室」，專門俾學生同埋研究員，開發唔同嘅電訊方案。高威嘅Joseph話，呢個實驗室內可以開發大部分嘅一體化通訊應用。高威今年攞咗唔少大破席，包括科技大學同埋迪士尼酒店，用思科平台開發唔少應用。有人話思科遲早變咗咪記勁敵，唔係無理由。