世界真細小

上星期去Infor用戶大會，見到I記嘅負責夥伴關係嘅Carlos Fonseca（方全勤），講起原來係葡國人，傾吓傾吓，原來係I記管環球技術服務嘅主管Annabella Yeu嘅老公。

Carlos以前响澳門做過治安警察，後來加入IBM調來香港，為人風趣，講澳門以前黑白勢力，槍林彈雨，簡直如數家珍。佢响氹仔有一家幾千呎公寓，星期五就過大海嘆番吓，佢又好熱心介紹認識葡國人與香港發展嘅關係，仲話雪廠街嘅里斯本市會出咗本書，識開埠以來港葡嘅互動，遲啲真係要借嚟睇吓。

講起Annabella，早兩年亦曾駐澳門，開發娛樂事業（唔少拉斯維加斯賭場都係I記客仔），佢目前負責嘅GTS，最近亦新建一家商業服務復原中心（Business Resilience Center），專門為啲機構成立後備中心，遇到意外馬上可恢復運作，忙到不亦樂乎。

行內人稱行內收買佬嘅Infor，舉行首次用戶大會，見到佢哋區域副總裁Mark Wong，原來佢三十年前MIT畢業後，返香港做O記，負責開發大中華區市場，開咗O記第一屆客仔大會，算係開國功臣。Infor呢幾年間，買咗成三十五家商業軟件公司，目前係全球第三大商業軟件公司，跟SAP以及O記打對台。國內商業軟件，尤其係MRP II同ASP管理 ，發展得好快，而且佢哋第一家收購係軟件Adage，原來亦响食品工業好出名，全美最大牛奶生產商DFA，唔少澳洲啤酒廠，都用Adage做生產流程控制，近年中國食品問題多多，相信肯定有市場。