2008年12月25日星期四

WGA 1.8登陸香港

最近興講社企,其中包括一家叫豐盛嘅髮廊,中心嘅董事係以前HP高層紀治興,曾經主管香港HP,同退休嘅去咗美國退休孫振耀,係好好朋友,當日兩人在HP,可謂一時瑜亮。紀治興退休後專心搞社企,最近又見番下報。

HP嘅舊人講起紀Sir都讚不絕口,話佢為人正版,誨人不倦。豐盛髮廊係十幾年前朱耀明牧師,睇完「英雄本色」受到啟發,學狄龍開車房,俾邊青學門手藝,改邪歸正,後來再開髮廊,吸引唔少有宗教信仰,又曾經係商界人士幫忙,現任豐盛主席魏文富亦係生意人,不過唔係做IT。豐盛最近集資擴張,大家好快會見到佢哋分店。

講起HP以前中國總裁孫公,除咗管理叻,仲識揸飛機,返美國後開咗間「企業管理之道顧問」,亦有返國內講課。聽講話孫振耀帶領HP在國內發展一枝獨秀,最佩服嘅公司竟然係內地嘅聯想,唔係美國IT公司。早前一直有傳言話孫振耀會做咪記大中華區阿頭,不過佢一直否認有興趣,而家梁念堅上任,大家都好有興趣知道,佢會唔會返國內創業。

講起咪記,作為一家軟件公司,今年十月在中國大陸推出新一輪嘅反盗版WGA 1.8,即係話視窗唔係正版嘅話,所有背景會變為黑色,而且系統會不斷彈出警告字眼,直至安裝咗正版為止,大陸市場引起好大迴響。咪記嘅Anger先生話,好多用戶根本唔知道自己用緊「翻梘」,所以新WGA以較明顯方法去提醒用戶,自己係「翻梘」受害者,但唔影響系統性能,如果用戶提出購買證據,仲可以免費換番一套正版視窗。今年十二月底前,香港亦會推出新嘅WGA

不過目前網上已流傳唔少1.8破解方法,亦唔知係唔係帶病毒,與其嘥時間破解,不如幾百蚊買套正版算喇。

沒有留言:

發佈留言