咪記飛上雲端

上星期去同咪記嘅孖屐亭阿頭「憤怒」先生食飯，入到去數碼港艾美酒店南坊，菜多客少，結果坐正門口位。「憤怒」先生最鍾意食小籠包，試過响上海住咗三日，日日三餐食上海小籠包，而且點樣食法仲好有研究，從來未俾小籠包啲汁燙傷過。

「憤怒」先生以前學過音樂，後來才轉行做IT，聽講話佢用咪記最近運咗一個Surface Computing嘅產品，佢即將用咪記Surface用嚟彈琴，直情有演奏級水準。不過，同佢食飯，都係講返IT，探聽下來年有乜大趨勢。

下年嘅其中一個熱點，當然係虛擬化，而咪記HyperV以外，又有VMWare同埋Citrix嘅Xen，可以話七國咁亂。但係佢提到咪記明年亦會推出Microsoft Online Services，呢項服務已經在美國推出，明年初會在香港推出。

所謂Online Services就係服務即軟件（SaaS），亦即係目前大熱嘅雲端運算，不過一般SaaS完全以網上形式提供，但係咪記嘅前端就係Windows同埋Office套裝。此外，一般SaaS直接在網上銷售，但係Online Services亦會供技術夥伴銷售，呢點跟其他嘅SaaS，好似Salesforce.com好唔同。

目前美國推出嘅SaaS包括Exchange同埋Sharepoint，而稍後應該仲有CRM for Exchange。既然Exchange變咗SaaS，咁技術夥伴除咗幫咪記推銷，做可以啲乜？原來SaaS仲有好多空間俾技術夥伴發揮，好似公司依然可以有自己AD，响網上再同Exchange嘅目錄系統「互星」。CRM更有可能要整合埋電話系統，所以技術夥伴應該唔憂會失業。