消費市場難做

剛剛收到UTM廠商FortiNet推出新型類資料，價錢又平咗，保平產品價錢愈來愈平。科記剛剛咗美國上市無幾耐，本地由以前H3C嘅Cherry打骰，聽講H3C亦會有保安產品推出，香爐又多隻。好在豬扒今年集中砌數據中心，低價位產品唔太在意。

今年做保安產品，非常氣咳，反而VMWare就愈做愈好，聽分銷商蛇仔話，今年做虛擬化，有唔少產品。VMWare除咗有esx，為企業儉番啲鐵錢，原來都有專門為Mac嘅產品，有隻叫Fusion嘅好似買得唔錯，港紙四百幾蚊，可以响OSX上行Windows 7同埋Chrome OS。VMWare嘅老頂Paul Maritz以前係咪記高層，VMWare俾EMC收購，繼續獨立發展，可以話係明智決定，形勢仲好過母公司VMWare。

VMWare嘅母公司EMC一向賣開儲存方案，不過競爭好大。而網上嘅儲存方案亦愈來愈多，除咗Symantec已經有雲端儲存方案，最近電訊商Verizon旗下嘅Verizon Business亦推出雲儲存產品，叫做 Verizon Cloud Storage，而且一直急住請人。

講開咪記，今個星期最多新聞講佢哋放棄手機Kin，因為銷量太差，成為咪記有史以來最快落架嘅產品。Kin好多人見都未見過，難以評論質素係點，但係咪記做消費產品，直至目前紀錄認真麻麻，好似砌iPod嘅Zune，亦係影都唔見。其實電子產品好難做，思科早前買咗一間做掌上錄影嘅 Flip，聽講亦係一鑊泡，所以HP買Palm會點，真係唔敢估。