IT媒體興衰

世界上唔少嘢，盛極而衰，其實無乜話可唔可惜。

IT其實基本上只係小眾嘅產業消息，專業嘅範疇。曾一度大紅大紫，只不過因為當日成為資本遊戲，先至大量膨脹。

但係IT產品有個特色，就係唔同電子消費品，通常既複雜，名詞一大堆，唔可以三言兩語講明，必須先消化整理，變為讀得懂嘅文字。傳遞呢啲訊息，好依靠包裝，一定靠公關同埋新聞配合。

IT產業另一個特色，係抽像觀念特別多，早前好興嘅「虛擬化」同埋目前嘅「雲運算」，可以話係人都啲關事。大家聽到頭昏腦脹，概念更各自表述，媒體生花妙筆，寫IT新聞仲要發揮小宇宙，好靠想像力。加上IT公司唔少係外國，語文基礎亦要唔錯。

近年IT公司亦好信網上媒體，積極投放網上廣告，平面媒體不加反減，買少見少。有以上寫作優點嘅記者，以後可能改行去寫小說，做村上春樹，寫番本1Q84。

媒體少咗，公關仲煩，唯有向網上發展。但點樣做網上公關，物色寫手，又要有新橋。部分公關轉搞Blogger招待會，不過搵博架大海撈針，亦可能唔係正職，唔通放工先搞記招？分分鐘仲搵錯五毛黨仲弊。有口痕公關話，咁搞落去，IT企業根本唔駛請公關，開個Facebook，搞個博就得，慳水慳力。