Sent from my 樂Pad

上周五iPad開賣滿堂紅，即日斷市。Apple公關Teresa做到氣咳。iPad成為潮人聖物，恨死隔離。3G版賣得特別好，可以用嚟睇伊咪，近期發現好多郵件最後填上「Sent from my iPad」，唔知真定假。聽講聯想年底會出一款叫「樂Pad」，不過如果用廣東話讀─Sent from my 樂Pad，感覺就有啲怪。

iPad趕上書展，書商推電子書，正好iPad上試吓。書展收到好多邀請，其中一個好眼熟，JuJu Chan陳鈺芸嘅「選美天后」，出咗一本勵志書《美麗是活出來的》，先知美麗原來唔係用Photoshop做出來。陳小姐嘅老豆，係號稱第三大商業軟件商Infor嘅老頂羅蘭士陳位千金。

講起Infor，公關Alpha最近亦唔撈。Infor出名係收買佬，香港人較為熟悉可以講係Sun財務軟件。Infor依然係私人公司，定位中型市場嘅企業軟件市場。Infor跟住兩家大佬，SAP同埋O記，確係幾索氣。Infor每年營銷額估計只係二十三億美金，大約只係O記嘅四分之一。

另一單新聞係咪記中國前總裁唐駿Jun Tang，由於一本自傳，被指學歷做假，國內引起爭論，所以出書都要小心啲。唐駿係微軟中國區總裁，後來Tim Chan空降，直至而家變咗Simon Leung。但係Jun在咪記立下不少汗馬功勞，曾經被稱為「最牛CEO」，學歷可以假，業績應該唔會啩？

咪記十月份推出Windows Mobile 7，近期已經開始分發有關新反本嘅資料。今個星期咪記唔少高層去咗美國參加MGX，慶祝Ballmer攞老人牌，做足三十年。而MGX亦推出各項消費產品新標誌，好似個光環咁。新Tagline係「Be What’s Next」，舊口號「Your potential. Our passion」終於落幕。咪記呢句口號，反映佢哋急於創新，唔好成人俾人覺得跟人車尾。