國際刑警香港開會講IT

每年香港唔多唔少都有幾個所謂信息安全會議，其實都係產品推銷大會。接到珊姐電郵，今年九月十五至十七日，香港會舉辦由香港警務處，同埋國際刑警合辦嘅首屆國際刑警信息安全會議2010。

國際刑警第一次舉辦信息會議，就揀香港作為會議地點，一哥鄧Sir仲致歡迎詞，證明本港在信息安全好有地位。今時今日，當差真係鬥智鬥力，而且信息犯罪好容易跨境進行，點樣執法好考工夫。雖然國際刑警會議揀咗香港開會，網站就只有英文、西班牙文、阿拉伯文、法文，始終搵唔到中文。淨係讀網頁，已經知道會議好國際化。

今次會議選址灣仔警察總部，大概唔會設公眾人士參觀環節，不過會邀請業界同學界做展覽。不過賣安全產品嘅公司咁多，警察總部有幾多位置？可能爭到頭崩。

收到HP嘅Terence電郵，推薦一齣話劇，先知佢係話劇發燒友，話本地劇團第四線HORIZONTE， 今個月十六至十八號，响大會堂上演話劇，叫「NOHOME MIDCLASS」，諷刺本港樓市嘅黑色幽默劇，內容關於一位中產階級，面對中年危機，改編自紐．西蒙(Neil Simon)作品「The Prisoner of Second Avenue」。

呢個劇本以前都拍成電影，由影帝積林蒙主演過，好似譯做「能屈能伸大丈夫」。最近樓市咁多新聞，HORIZONTE改編用嚟講一位中年人面對失業危機，又受供樓壓力，精神失常鬧出好多笑話。初初以為Terence擔正主角，以佢人生經歷再加平時賣藝一成功力，一定入木三分。可惜佢今次唔粉墨登場，真係可惜。

最近HP嘅宣傳好似車輪戰，唔知同大老闆出巡訪港有乜關係，可能已經講到氣咳嘞。