蘋果愈嚟愈紅

芬蘭電話商諾記換咗老頂，由咪記大佬Stephen Elop頂上，佢以前睇嘅商務應用部；包括咗BPOL、商業方案、UC。換句話，即係包括Office系統，例如Exchange、SharePoint，再加上Dynamics、仲有OCS，非常龐大，約佔咪記業務三分之一收入。Elop成諾記首位非芬蘭人CEO，可唔可以力挽狂瀾？

諾記智能電話靈魂嘅Symbian，但今年Symbian^3出台後，評價一般，可能就此加速董事會改革決心。

iPhone加上Android壓力，諾記風雨飄搖，咪記唔好得去邊，Windows Mobile變成also ran，十月份再有新版本推出，大家拭目以待。以智能手機嚟講，企業市場仍以「黑莓」為主，因為號稱世界最安全。不過，唔少國家要求檢查黑莓內容，如今黑莓有幾安全？好成疑問。

另一方面，唔少企業應用陸續咗蘋果平台出現。上星期豬扒公布，Junos Pulse終於正式登陸iStore，可安裝响跑iOS 4.1嘅iPhone或者iPod Touch（蘋果已宣佈iPad會在十一月支援iOS 4.2，即係話到時iPad亦可支援Junos Pulse），可用無線網絡連接SSL VPN同埋用網絡加速。Junos Pulse係近年遠程存取中，最具野心嘅產品，大張旗鼓支援iPhone，智能手機人心背向，唔駛問阿桂。

另一家專做網絡加速最大廠商「河床」，就發佈Steelhead Mobile 3.1，終於支援Mac平台及Citrix。河床願意支援Mac機，肯定受到唔少市場壓力。雖然Mobile 3.1只能係用响Mac電腦上，相信亦好似Pulse一樣，遲早支援iPad。蘋果產品從消費產品變成企業產品，似乎指日可待。