O記火人祭

一九九八年谷歌網頁頭版嘅Doodle，曾經出現一個創辦人Larry Page and Sergey Brin親自設計嘅「火人祭」（Burning Man Festival），暗示佢哋去咗內華達州黑石沙漠。「火人祭」本來係三藩市沙灘上營火晚會，後來被警方干涉話有火警危險，結果搬去沙漠，今年估計四萬五千人參加，來自世界各地。香港最出名嘅參加者，至今為止應該係Rosemary。

「火人祭」有唔少音樂會，煙火、花車巡遊同現場藝術表演。唱片連卡佛都有得賣，但點可以响沙漠留一個星期？駛費當然唔少，門票由二百一至三百六十美元，唔係一般人玩得起。好多人樂極忘形，亦會食軟性毒品，多數係大麻，好多人以為去到「火人祭」，可以公然吸毒，今年內華達州警方派出大量臥底，唔少外來遊客斷正，惹火上身。香港IT人唔少美國讀書，呢個「火人祭」亦有唔少人熟悉，有無人返唔切工，唔知咯。

回歸正傳，再下星期O記開始一年一度嘅OpenWorld，加上JavaOne會議，仍然選址三藩市舉，今年亦變咗好惹火。官司纏身嘅HP前老頂Mark Hurd首次亮相，肯定係傳媒焦點。O記亦正控告Google有關Java公開源碼嘅技術侵權行為，要求停止發展Android，Google公開亦宣佈唔會出席OpenWorld。不過，Java技術過去兩年好似無人駕駛，各自修行，太陽又等人買，愛理不理，直到O記收購，想撥亂反正，相信太遲。

O記購入Sun之後，其他發展Java技術嘅公司亦好頭痛，最好笑係Google仍然仲係OpenWorld銅級贊助商，可能一早搞落，錢都俾埋。O記大力發展太陽，加上收購咗Weblogic，I 記亦好頭痛，上星期再向記者介紹Power處理器夾AIX同Websphere，唔少環節針對Linux同O記。

OpenWorld嘅重點，可能就係Larry新寵Exadata。呢部機器本來委約HP生產，後來收購太陽之後，O記將唔少技術加入，本港唔少O記用戶都預約試用。