又見MArk Hurd

剛剛收到O記有關OpenWorld嘅消息，其中有HP以前老頂Mark哥介紹Exadata新版。呢部機器以前一向由HP開發，後來O記買起太陽，一腳踼開HP，自己一手包辦，不過速度即係三級跳。同樣係x86，唔通太陽真係識飛？

Mark哥以前曾經一手搞起大型平行數據庫廠商Teradata，對Exadata一啲都唔陌生。除咗Mark哥，O記唔少人都係Ex-HP，對HP舊人特別情有獨鍾。亞太區老頂史提夫、歐陽就曾經做過HP軟件部門（不過係由於收購WebLogic所以先加入O記），印象中呢位先生高爾夫仲打得唔錯，對電訊好有認識。當年Compaq曾開發相當出色嘅電訊業軟件，由史提夫推廣，佢亦曾經做過香港電訊。

太陽雄霸過電訊業，有一段時期電訊業IT可能只識用Solaris同Oracle，雙劍合璧，更令HP頭痛。講起O記，Exadata已經响本港出咗貨。不過聽I記口痕友話，而家HP最擔心，兩間公司前幾年好多拍乸關係（亦做唔少顧問工作），成對軟硬天師咁。O記買埋伺服器，一定叫客仔「一店購物」，咁就好弊。好似和仔咁，以前成個數據中心都係HP，家已經多咗啲O記，HP舊人又多，好難保將來唔攆走客仔。

記得幾年前，聽O記專家講過有關點樣利用低價SATA硬盤網格（Grid），設計出勁過光纖硬盤嘅機器，對硬盤同網格嘅研究，可說非常深入。Exadata快到快到甩轆，一啲都唔出奇。 Exadata其實即係以前 I記嘅AS/400，軟硬加埋數據庫（DB/2），而家變咗做嘅System i（不過而家叫Power Systems，除咗i5/OS，包埋AIX同埋Linux），仍然有捧場客。唔少都預測AS/400唔捱得耐，結果愈買愈有，唔怪得拉利對Exadata咁有信心。