雅虎新年大計

新春伊始，向雅虎老總 Alfred拜年，順便講今年大計，今年雅虎會推出多項服務，包括更多本地內容，仲有更多本地新聞嘅串流視像。佢話雅虎網站嘅新聞每日更新三四次，如果有突發新聞，仲更新更密，好似菲律賓人質事件，當日雅虎網頁更新超過十次。

愈來愈多人用手機上網，流動上網人口大增，睇新聞網上方便過買報紙，尤其突發事件，市民趕住上網睇最新發展。今年雅虎會推出Livestand，類似電子報欄功能，畀網民自己訂閱新聞。雅虎係本地入門網站長期冠軍，舊年底推出iPhone App，到而家累積咗十萬次下載，即將有 Android App。

電子商貿總監Mark Liu講，佢啱啱調任，掌管本地拍賣平台，並且今年中負責推出網上付款網關，加上佢哋亦籌備緊團購。雅虎本地有八百萬件貨品， 每月獨立瀏覽人數達兩百萬，以人數計僅於機場。原來香港拍賣網站，最賣得貨品係時裝類，主要韓國品牌，其次係美容用品；第三類最特別，竟然係玩具，其他國家好少呢類情況。零售租金勁升，雅虎造就唔少網上創業奇跡，不過挑選商戶好謹慎，否則分分鐘自己都變成新聞。

Alfred話網上廣告從搜尋偏好去向用戶推荐貨品，好受廣告商歡迎。只要知道用戶想搵乜嘢資料，就可以針對發送廣告， 吸引網民登入廣告商網站（Click Through Rate）可以提高四成半。

雅虎响亞洲市場特別成功，聽講話係內容本地化，處理中文能力更特別好，亦係咪記想收購雅虎嘅原因之一。二OO八年底，咪記買唔起雅虎，終於請咗雅虎嘅搜尋靈魂人物陸奇，重新開發搜尋引擎Bing。呢位陸奇先生亦係電腦天才，响上海復旦出身，後來美國Carnegie Mellon嘅Edmund M. Clarke教授到訪復旦，驚為天人，邀請呢位陸先生去CM讀博士學位，畢業後進入I記研究實驗室，慢慢成為矽谷最受人尊敬嘅工程師之一。後來訪問陸奇，佢話中國嘅成功，原因之一係有公平嘅考試制度，佢先可以出人頭地。