防爆水管I記有法

每年I記都個叫Pulse大會，包括Tivoli同埋Rational，近年I記嘅硬件增長唔算大，軟件增長反而好快，負責盈利愈來愈多。其中有隻重點產品叫Maximo，專門做資產管理（其實可能叫設施管理啱啲），用嚟作大型物業管理。

會上碰見香港人Philip Lo，呢位老先生（唔係講年紀，呢位先生真係姓「老」），從一九九五年開始响香港搞Maximo，唔少大設施管理軟件，由呢位老先生任CEO嘅Lexco（凌昱信息技科）負責，變咗I記拍乸後，年年嚟Pulse取吓經。

Maximo係I記搞智慧城市一個重要組成軟件；專門做設施管理。據I記講，佢哋同唔少物業管理系統嘅公司；包括施耐德、Johnson Controls、 Honeywell改善物業設施管理效率，遲啲會同Autodesk嘅BIM軟件Revit宣佈合作關係。Pulse大會一個有趣環節，介紹點用Maximo管理城市底下嘅水管，再用SPSS統計預測模式，估計水管老化嘅潛在問題，點樣做水管維修保養。其中一個案例，係首都華盛頓特區嘅水管，部分美國內戰時期時安裝，問題叢生。用咗Maximo加埋SPSS之後，預防食水滲透同爆水管，處理速度亦快好多。聽講本港水務處亦有搵I記，利用SPSS預測尖沙咀水管維修，效果幾好。

香港水管替換速度落後，經常搞到交混亂。近期四圍爆水管，水務處應該認真考慮，參考吓外國成功案例，唔好頭痛醫頭，腳痛醫腳，日日塞車又撲水…

講完軟件再講硬件。上星期O記Crown Plaza搞儲存高峰會，人頭湧湧。O記收太陽，以儲存系統最掂，除StorageTek外，ZFS亦有唔少獨特技術。儲存廠商各出奇謀，HP嘅3Par亦開始宣傳攻勢。三月中亦有高層到訪香港。聽講HDS亦有新人加盟，Tandberg做開金融客戶嘅Spencer Lo就轉行做儲存，今年儲存有得做，大家都好落力。

思科嘅Jack Tang去咗做IPS公司嘅Palo Alto坐鎮香港，舊人PK Lim仍响新加坡，呢家由Netscreen舊人創立嘅防火牆公司，舊年CEO都走埋，正公開招聘。