FB報平安

肯定唔係天方夜譚，日本地震勁過汶川超過二十倍，話音電話打唔通，數據網絡仍然運作（Internet出現本身為咗應付核戰，設計可以防災），結果日本地震當日大家改用Facebook同Twitter報平安，呢啲工具通訊方式，一次過可以通知好多人，好有效率，唔駛擔心。Google就成為網上尋人工具，社交網絡同尋搜工具特大災害中，估唔到發揮咁大功能。

唔經唔覺，咪記响香港踏入第二十年，仲話舉辦演唱會慶祝。五月十四日會九龍灣九展搞演唱會；嘉賓包括謝安琪、張敬軒、孫耀威、劉美君、梁文音等環球歌手加埋霍世潔（唔係歌星，係二胡演奏家），不過大家買Windows 7先至有擦卡抽獎，入場慶祝咪記生日，有幾多人會中真係唔知，聽講話門券每張四百大洋。不過以環球歌星，獨欠陳奕迅，真係有啲遺憾，至少佢可以唱下「時光倒流二十年」或者「我的快樂時代」，不過唔好唱「打回原形」。

無獨有偶，個人電腦上咪記平台上（DOS作業系統）首個病毒，今年原來亦係二十五周年紀念，呢個病毒仲早過咪記嚟香港。唔知「撳錢」會唔會問，PC上已知最早電腦病毒係乜？答案叫做Brain，由巴基斯坦兩兄弟創作，防病毒公司F-Secure竟然搵返呢兩兄弟Amjad Farooq Alvi及Basit Farooq Alvi做訪問，佢哋响巴基斯坦開設嘅公司，亦以Brain Telecommunication命名。F-Secure首席研究總監Mikko Hypponen到當地製作一段十分鐘短片，名為「Brain – Searching for the first PC Virus 」，呢段短片已經上載到Facebook，相當有趣，又多一個理由開FB戶口。