虛擬網絡勢成投資亮點

上星期講到VMWare高價收購 Nicira後，唔少基金開始研究網絡虛擬化嘅投資機會。

虛擬化之後，數據中心內多咗虛擬機器（VM），複雜性大增，以往VLAN技術無從應付，唔少技術湧現；其中一種係思科Nexus系列交換器大力支援，VMWare夾埋Citrix、Arista、紅帽等開發嘅VXLAN標準。但並非所有廠商都支持VXLAN，好似豬扒咁，一直對VXLAN抱懷疑態度。不過VMWare好有號召力，好似Brocade，亦在VMWorld推出支援VXLAN嘅ADX交換器閘道，幫數據中心落實VXLAN；河床就宣佈Cascade支援監察VXLAN，唔少人話VMWare收購Nicira，指在補足VXLAN一啲先天缺陷，但Nicira亦可完全取代VXLAN。VXLAN是否只係過渡性技術？VMWare實際立場，諱莫如深。

解決VM化，終極方案係OpenFlow技術。思科一度公開質疑OpenFlow成熟程度。今年四月，谷歌宣佈渠哋全球網絡全面OpenFlow化，大家驀然驚醒，OpenFlow不再係空中樓閣。谷歌佔全球上網流量約6-10%，可以話為OpenFlow認受性，打下強心針。

OpenFlow係公開標準；簡單講係拆開交換機嘅Control及Data Plane，Control Plane可按唔同標準，以軟件控制不同協定流動甚至 QoS，又被稱為Software Defined Networking（SDN）。SDN嘅研究重鎮係史丹福大學Clean Slate Lab，亦係OpenFlow發源地之一；有位前主管就Guido Appenzeller創辦咗Big Switch，今年一推出Floodlight嘅Openflow公開軟件，馬上成為大熱，幾乎獲所有主流廠商（思科除外）一致支援。

呢家 Big Switch公司好細，Nicira被收購後，即刻成明日之星。虛擬網絡公司好可能係明年風險基金投資亮點。

網上人哋話有五毛黨，原來美國科技公司响網上亦請唔少博客；谷歌同甲骨文就Andriod，侵犯Java嘅API專利權打官司，上星期陪審團投票傾向對谷歌有利。較早前，爆出雙方聘用博客寫手，被陪審團要求澄清，甲骨文作出申報，谷歌就否認搞所謂「有償博客」。但係甲骨文就力指「谷歌以直接及間接方式，經營『具影響力人士』」嘅網絡，以達到影響外間對知識產權認知嘅某些企圖…甲骨文相信谷歌利用呢個廣泛『具影響力人士』網絡，審訊過程中鼓吹谷歌嘅立場，影響公眾輿論。」

美國科技公司打官司，涉及金額天文數字，無所不用其極。聘用寫手網上造勢，係公開秘密，又怕遭人口實，明文禁止請寫手，實則各師各法，博客亦各為其主。

上個星期Windows 2012服務器推出，本應係大新聞，但好似無聲無息咁。Server 2012係從2008嘅主要升級版，亦以雲端能力做號召。此外，唔少Qualcomm廠商，陸續推出SnapDragon處理器嘅Windows RT平板，除咗戴爾同埋三星落疊，仲有華碩聯想等，但獨缺HP。