2012年9月19日星期三

智能手機妙用


智能手機改變世界,事實上,除咗方便生活,智能電話亦成搵食工具。

上星期,香港推出專供訪港遊客嘅Handy Phone,專門借畀訪港旅客,每日租八十八蚊港紙,3G數據任用,本地及國際電話任打,最緊要係加咗好多遊客資訊,一般嚟講,遊客只要打四、五個國際長途,已經回本。講真啲,Handy Phone都係靠廣告維生,遊客隨時又可打本地電話,去落廣告店舖問價訂座,生意一定好啲。出門旅遊,有部當地智能手機,亦的確方便,睇Google Map,按圖索驥,搭車行路,又唔駛擔心漫遊數據,Handy服務勁有創意,抵讚。

三藩市亦係創意無窮。最近聽一位當地司機講,舊年當地創辦一個叫Uber嘅手機App,專供外出公幹嘅生意人,去到唔同美加城市,隨時可叫豪華轎車司機接載。Uber本身唔經營車隊,只係為加盟嘅司機,提供專用iPhone一部,同司機保持聯絡。Uber可以靠客戶手機上嘅GPS,探測最多顧客嘅位置,馬上傳送到司機iPhone上Google地圖,顯示邊區最多環境,收到柯打再用iPhone通知司機,好似漁民捉魚咁,水底聲納探測魚群一樣。顧客叫車,Uber通過手機App即刻計費,用信用卡過數,然後再同司機拆賬,原理同的士咪表差唔多。據司機大佬講,雖然要向Uber買部專用嘅iPhone 4S,用Uber後,生意勁升四成,呢家Uber已集資四千幾萬美元,投資者包括Google。但Uber嘅經營方式,又似的士多過出租轎車,打擊部份州嘅的士生意,已响美國引起訴訟。

香港亦有一個叫「的士Go」程式,但係比起Uber,好似無咁成功,可能香港截的士實在太方便,同App唔同命。

沒有留言:

發佈留言