Siri變Silly

上星期，美國嘅Rapid7公佈IE有攻擊弱點，從IE 7到IE 9都受影響，截稿時咪記已承認有漏洞，但仍然未有補丁。Rapid7擁有全世界最大免費攻擊測試平台Metasploit，大家只要下載Metasploit就可做攻擊測試。Rapid7話，仲未試Windows 8跟機嘅IE 10，同樣有漏洞機會相當大。Rapid7係從黑客組織Nitro嘅攻擊發現呢個漏洞。保安產品廠商「單記」話，呢個組織同中國大陸有關，以IE漏洞蒐集大公司情報，近期網絡攻擊好似變成國家行為咁，中國政府循例否認。Rapid7就勸止用戶，IE未出補丁前，轉用其他Brower，好似 Chrome或Safari。

IE有嚴重漏洞，不過大家只關心iPhone。除咗iOS 6安裝後問題多蘿蘿，全城炒賣iPhone不亦樂乎。雖然Apple地圖錯漏百出，所謂「3D」，其實仲差過諾記，用渠開車唔知去咗邊，亦唔識教人搭公共交通，廣東話Siri又十問九唔知，或者問非所答，可以改名做Silly。Flyover實景無實際作用，轉到頭暈；除非係坐直升機，論實用程度同Google街景差好遠。 iOS 6內Youtube更「被消失」，要單撈過。上星期最多人想知，相信係：「點樣可以用番iOS 5？」

iPhone無阻用戶熱情，各大流動電話商紛推，價錢又有水位走。蘋果又一次證明，電話功能唔駛太好，有型就得。不過講返蘋果，AppleTV嘅AirPlay功能，的確方便，為iPhone同iPad增值唔少；Steve Jobs依然留低唔少好嘢。本港MagicTV機頂盒亦一啲唔弱，只要升級7.0 Beta版本，就可支援Airplay，慳番唔駛買AppleTV，番到屋企，投映個iPad串流上電視機，效果高清，睇youtube或者TED，舒服好多。呢家公司係落戶香港科技園最成功例子之一，論香港本地消費電子產品，MagicTV要畀十個Like。

三星嘅Galaxy定咗今個星期四灣仔華潤大廈舉行發佈會，Note II世界巡遊，終於嚟到香港，Note咁成功，主要係芒大，香港人鍾意煲劇，其他功能都係次要。