Blockchain會議猛人雲集

上期，講開Simon Tai已離開Symantec，原來只係離職前休假；真係鎖呢，聽講渠加入咗Splunk，應係接替Dominic Mak空缺，管理北亞洲區業務。Splunk專做機器數據分析，本港唔少大客戶；包括馬會同海事處等，亦可用嚟做IT保安例如SIEM之類，Symantec不開發SIEM後，客戶亦係陸續過渡到Splunk。

Splunk同Symantec有唔少共同客戶，可從Symantec終端防毒及數據流失防護（Data Loss Prevention）蒐集數據，甚至自動產生PCI等報告。Symantec現時有唔少客仔，有潛在機會採用Splunk。唔少Splunk用戶，只係集中監察IT基建，相當Simon可為Splunk拓展客戶。

下星期四（七月廿八日），香港數碼港舉辦Blockchain會議。Blockchain應用最出名當然係虛擬貨幣Bitcoin，但其實應用範圍好大。唔少以為，Blockchain係近年Fintech最有影響嘅技術，財爺亦曾特別提及大力發展。

數位講者之中，包括咪記及IBM代表。另外，相當於中國古代翰林院嘅中國科學院，派出計算機技術研究所助理教授蔣海，呢位蔣博士，係國內研究Blockchain（國內叫「區塊鏈」，或者「分佈式共享總賬」，後者譯法冗長，其實比較貼切）先行者，研究IP網絡設計亦出名。蔣海創辨國內專門開發Blockchain技術應用嘅布比（Bubi）區塊鏈，捨棄Bitcoin挖礦演算法；因為網上建立去中心化嘅信任，根本上唔須要挖礦式演算。

布比應用Blockchain非常落地，可管理積分、供應鍵管理、網貸等；積分可畀用戶自由轉讓從商家獲得嘅消費積分，成另一種虛擬貨幣。布比亦同國內網上金融平台錢香，合作搞咗個黃金珠寶區塊鏈供應鍵管理平台。布比演算法速度極快，相信Blockchain技術起飛，布比極可能成另一家阿里。布比獲得國內天使投資基金點亮資本幾百萬美元投資。點亮資本包括高炎和李翀等著名國內IT人，香港合夥人則係中大訊息工程系兼任教授勞維信，曾經在Bell Labs、香港電訊、C&W Innovations出任高層。

另一位講者，麻省理工Media Lab高級顧問Michael Casey，則曾任職華爾街日街多年，專報導虛擬貨幣。舊年Casey獲邀加入Media Lab負責數碼貨幣項目，渠曾寫過「The Age Of Cryptocurrency」一書，解釋虛擬貨幣點改變全球經濟秩序。另一本書「The Unfair Trade」亦有趣，講述全球金融系統敗壞毀滅中產階級，甚具前瞻性，當日分分鐘有書迷要簽名。

不過，全場唯一香港人講者Pindar Wong，係Smart Contracts Initiative組織創辨人。Pindar創辦香港首家商用ISP SuperNet廣為人知，可算係香港科大最著名科技轉移項目；當時Pindar正讀科大博士。渠目前係全球互聯網社群知名人物，曾出任ICANN首屆副主席，最近開發Blockchain，開咗一家叫VeriFi (Hong Kong)，專門從事互聯網金融基建業務。Pindar固然利害，渠媽媽黃錢其濂亦唔簡單；除咗係港英時代高官又做過立法會，英文造詣一流，近年致力提昇學生英語水平，出文學作品及英語書，總結幾十年學英語經驗成「4C」，傳授點學成鑽石級英文。