LoRa物聯網技術遍地開花

前年，富士康宣佈投資法國初創企業Actility。Actility專門開發營運商建立物聯網IoT用嘅LoRaWAN低功耗超窄頻廣域網。除咗Actility，法國SigFox亦係集中發展IoT物聯網網絡；分別在於SigFox係營運商，終端技術開放，畀合作夥伴生產唔同IoT設備。Actility參加咗LoRa聯盟，開發LoRa網絡產品及終端產品，係開發基於LoRa嘅ThingPark公開標準技術產品。

上星期，富士康响香港夥拍Actility，成立ThingPark中國合資公司，出售ThingPark嘅SaaS軟件、數據管理技術、網絡方案、傳感器等。ThingPark客戶對象，包括咗籌建智慧城市嘅政府，唔少國內城市都有類似計畫。

上星期，韓國流動營運商SK Telecom宣佈，以LoRa技術建立南韓全國LoRa LoRaWAN，幅蓋率達99%，係全球首個營運商LoRa廣域網，SK Telecom同時有利用LTE-M制式建立IoT；但LoRa廣域網價格低廉。SK Telecom公佈每月數據傳輸1000KB嘅Band IoT 35合約，只收三十美仙，相等於二個三港幣一個月，數據足夠嚟做電子抄表，唔駛逐戶上門；LoRa有機會催生新一代智能家居用電子消費廠商三星亦有參與建立上述LoRa廣域網，三星同時亦係SigFox投資者之一，但LoRa仍然唔能夠漫遊（即係IoT設備搬去另一地區唔用得，唔多適合做穿戴設備，但抄錶或智能家居等就無問題；SigFox則屬於全球IoT網絡，一張合約全球任用。）三星電器會兼容兩種制式。另一家推出LoRa廣域網嘅營運商，則係荷蘭KPN，今年七月一日啟動，已連接一百五十萬件物件。

LoRa Network係公開標準，有唔少設備供應商，用免費頻譜同埋展頻技術，穿透力強，甚至可自行建網，營運商亦可參與LoRa推出合約服務；相信香港營運商亦正考慮推出類似服務。不過Vodafone及華為則合作推另一種制式LTE-M，幾時幅蓋香港就未知。

Symantec分拆之後，Chris Lin去咗Veritas，繼續做IT保安生意嘅Symantec則宣佈請咗陳毅威Alan Chan出任大中華區總裁，呢位陳先生一睇英文姓氏拼法，就知係香港人，曾做過金門建築同P仔，然後入咗EMC，再發展中國市場，一做十七年。今年轉投Symantec，仍係駐北京；聽聞南大中華區老頂Simon Tai，則已離開。