從雲端跌落凡間

市場多宗電訊商改組，顯示電訊商紛紛撤離雲業務。

一直有傳聞美國電訊商Verizon，亞太區企業服務賣畀CenturyLink，一直唔成事，集團副總裁Francis Yip做咗兩年幾後最近亦離任。最近Verizon有人事變動，由駐澳洲嘅David Kim負責管理亞洲及日本地區（包括香港）Verizon Enterprise Solutions業務。Francis講多國語文，除英文亦講日法文，以前做過OBS同埋大地瓜，為Verizon瘦身一輸後，終於功成身退。

Verizon澳洲業務唔錯，包括為澳洲公民護照提供加密服務，減低偽造護照可能，提高過境安檢準確度，縮短過境輪候時間。Verizon亦為澳洲稅務局提供認證方案，核實個人身份，以前Francis亦經常出入澳洲。

而CenturyLink則係美國第三大通訊公司，規模僅次於AT&T同Verizon，Verizon在港業務唔少係通過收購MCI得來，而2011年CenturyLink則以二十五億美元收購咗Savvis數據中心業務，並進入企業市場，想在亞洲區建立高質數據中心，同NTT定位差唔多，但係上月以三百四十億美金收購Level 3後，隔數日以二十一億五千幾萬美金出售全球五十七個數據中心及托管業務，集中賣水喉業務，原來CenturyLink認為雲業務成本太高，難怪對於收購無興趣。

CenturyLink出售雲業務，顯示電訊發覺雲業務不易為，全球最成功雲業務，仍然係Amazon，後來居上則有屬於咪記Azure，聽聞I記放棄SoftLayer品牌，集中BlueMix嘅PaaS業務，上季增長好快，其他強敵亦全屬IT公司，包括咗Google及Salesforce，雲業務全集中於 PaaS，仲未講剛以九十三億美金，完成收購NetSuite ERP嘅O記，相信O記下季力推PaaS雲服務。電訊公司只識IaaS，好難同IT公司競爭，阿里同埋騰訊亦有意拓展海外雲服務，即使係發起OpenStack嘅Rackspace，亦剛宣佈以四十三億美金，出售業務畀私募基金Apollo，業內日日洗牌。

不過美國AT&T收購時代華納，相信係認為加埋內容先有出路，唔再一味雲端發夢。不過本港九倉亦出售電訊業務Wharf T&T畀MBK及TPG，九倉一向力推「雲」、「網」，有唔少ICT業務，相信成績亦強差人意。係九倉擁有畸寶，加埋內容一樣經營不易；但亦可能係唔夠專注所致。