咪記研究院臥虎藏龍

上星期去咪記亞洲研究院十周年慶祝，新院長洪小文演講，加上「標哥」講創新。今次由於北京搞奧運，所以原本大本營在北京嘅亞洲研究院周年紀念，移師香港，搵埋三大校長助慶，可算熱鬧。

亞洲研究院從李開復在中關村開檔做院長，李開復去咗Google，首席科學家張亞勤頂上，跟住係沈向洋接任，然後係目前嘅洪小文院長。

李開復、沈向洋、洪小文，三人有一個共同點，就係全部都響美國卡内基梅隆大學（Carnegie Mellon）讀博士，全部係師兄弟，可見呢家大學美國嘅地位。沈向洋曾响港大讀過哲學碩士，叫做同香港有啲淵源。

四人之中，只有張亞勤係美國喬治華盛頓大學博士，不過張亞勤出名係神童，廿三歲就已經攞博士，好有學者風範。咪記亞洲區搞Imagine Cup，俾亞洲區各家大學各顯神通，就係呢位張博士嘅傑作。佢曾經臨危受命，被大隻佬CEO Ballmer請番去總部救火，改組流動電話部門，係咪記功臣。

今次活動有大批內地記者參加，陣容鼎盛，標哥入場，仲全場起立拍掌，不過到咗「釘模」就有啲蝦碌，不過小弟見過「標哥」自己做「釘模」時都「輕」機，今次其實好小兒科。

講返呢位洪小文院長，係語音識別專家，記者會上展示亞洲研究院嘅技術，其實更加有趣，就係將一幅圖片某部分攞走，不過佢哋計數叻，幾複雜圖形，連頭髮咁複雜微細，都可以計走。但响圖片計走啲內容唔出奇（因為圖像運算成數學公式，技術上發展好耐）。奇就奇在，佢哋仲可將嘅圖片被物件遮住嘅部分，用數學計番出嚟。佢最後一張圖片，係將一張平面圖畫，計到好似立體咁，佢話將來可以計到附近三百六十度都睇哂，真係服哂佢。