HP台灣換老總

上星期聽講HP嘅Felix See榮升VP，並調任台灣區老總，而到香港走馬上任嘅係吳福來，Eric Goh一向長駐新加坡，睇名字串法，就知唔係香港人，不過佢上任前係亞太區及日本科技方案部市務副總裁，係香港市務部Fred Sheu嘅老細。佢之前都係紅色，做過康柏嘅新加坡區老總，之後就一直做區域性工作。

不過聽講Eric Goh唔會舉家移民，逢星期六就會返新加坡老家。而Felix就調去台灣兼升職，接替因為「家庭因素」而辭工嘅台灣老總楊人捷，做科技方案部副總裁。呢位楊老總响一年前仲响鴻海富士康，幫郭台銘打工。富士康為HP做唔少代工，大家好熟絡，轉到HP幫手，估唔到一年後就鬆人。

不過七月底，HP台灣大執位，除咗近日退休嘅蔣群儒，PSG嘅陳敬宏又轉去手機廠HTC做大中華區總經理，舊年HP嘅PSG業務突飛猛進，尤其手提電腦更加非常好賣，而PSG以前嘅歐明哲，調去新加坡無耐，又跳槽去聯想做台灣老總。估唔到除咗電腦好賣，人都好搶手。

楊人捷離職，盛傳話管理作風不協調（可能加上條數唔掂），台灣老總個位都幾難坐。

Felix唔係猛龍唔過江，佢最大分別係銷售出身，HP老細Mark Hurd舊年大舉收購軟件業務，錢駛唔少，所以對企業軟件同服務條數，期望非常之高，一於調Felix過去發功。

聽講HP收購嘅SPI Dynamics（專做Web應用保安檢查）CTO兼創辦人Caleb Sima，九月份可能到訪香港，Caleb Sima响美國好出名，除咗後生靚仔（今年只得廿八歲），仲曾經係位駭客，除咗未俾人拉過，在美國軟件開發行業好出名（曾經當選咪記嘅最有價值專業人員MVP）。90年代末期，Sima中學未讀完就出來創辦SPI Dynamics，對於大學學位更嗤之以鼻，廿零歲已經賺到盤滿砵滿，仲表明過想三十歲退休。唔想讀書又想做億萬富豪，除咗Bill Gates同Michael Dell，又多位偶像人物。

Sima出過一本有關Hacking既書，叫Hacking Exposed Web Applications，有興趣可以到Amazon買，到時搵佢簽名。