HP成績表

上星期，咪記合作夥伴周年大會，會展二樓演講廳座無虛設，上星期咪記先啱啱亦响同一地點，搞亞洲研究院十周年嘅標哥演講，唔怪得咪記阿B小姐話做到氣咳。

近期唔少IT大藍籌公布業績，其中HP响上星期嘅成績表，最多人討論，市場吹淡風之下，純利竟然上升14巴仙，最犀利竟然係筆記簿電腦（聽講2133仲賣到斷市），銷量勁升26巴仙。而增長最強勁係亞洲區，上升8%。不過，HP傳統嘅IPG（即係主要係打印機部門），就斯人獨憔悴，只增長3巴仙，市場佔有率下跌，結果IPG當然係重組（即係瘦身是也！）。

HP嘅PSG（個人電腦部門是也）以前叫做「窮親戚」，當年嘅阿頭Zoe姐拼勁過人，係阿J最佩服嘅行政人員之一，不過形勢唔好，超人都無乎。唔怪得聽講咪記阿頭，年年去拜車公廟，有時勤力可能係次要，唔見「車公」，都應該去「攝太歲」，趨吉避凶。IPG同埋PSG今年秋季產品造勢大會，會响9月中响旺角朗豪酒店聯合舉行，屆時應該唔少亞太區記者會到香港。

無獨有偶，9月9號，香港嘅基建產品分銷商B & Data，亦會在旺角朗豪搞Solutions Day，幾乎大部分大牌子都會上台講嘢；包括Blue Coat同埋Riverbed兩個對家。聽過因為B & Data以前做咗十幾年Packeteer，所以順手做埋Blue Coat，最近又新簽咗Riverbed返嚟，真係要乜有乜（唔知會唔會賣豬扒嘅WXC），但係豬扒嘅PM Chan會上台講交換器，最近阿J聽過一次介紹，實在值得推荐。不過B & Data代理嘅保安產品仲多選擇，一日之內難得可以見哂咁多品牌，有時間不妨去旺角朗豪捧下場，聽吓 CEO阿Louis Fan，點會傾得掂咁多大品牌。