SAP記轉老頂

同I記朋友講開，先知原來張烈生去咗SAP做中國區董事總經理，Timothy係I記响唐老總之前，响03至05年曾做過香港區嘅總經理，無耐就返大陸。Timothy係84年中大畢業後，入咗I記一年，跟住就去咗大陸發展，為公司做開荒牛，中國經驗可以話數一數二。

85年中國加速改革開放，所以Timothy見證中國經濟從無到有，接觸過唔少行業。I記亦係最先進入內地IT企業，內地不少主要客戶，都利用係I記客仔。

雖然話SAP在ERP市場仍然係一哥，不過中國區總管呢個職位唔易做，因為上任嘅原香港區主管（仲睇埋台灣）嘅李文俐，做香港嘅時候好好哋，點知舊年升上神檯，取代原德國藉嘅西曼，做咗中國區總經理，八個月後就想「多啲陪家人」而離職，證明呢份工幾難哽。

李文俐只做咗八個月，就離開咗原本做咗十八年嘅SAP，所以證明升職未必係好事，不過李文俐係原藉新加坡，响香港做事如魚得水，做得可以話相當開心，但到咗國內，可能就有文化衝突喇！SAP亦可能因此立心要搵一個國內經驗豐富嘅人，結果輾轉四個月，才覓得阿Tim加盟。阿Tim唔單止人脈廣闊，跑過大江南北，而且完全掌握中國大陸人思考方式同埋演變添。

大陸嘅高層人員，一向都傾向請香港人，原因唔再係英文好，（好得過老外？）而係熟悉文化差異。SAP又非常靠拍乸開拓市場同埋為客戶度造方案，所以如果同啲拍乸唔啱咀形，其實都幾煩。不過阿Tim為人好沉實，睇落點都唔止八個月啩！