換機救地球

今日係世界地球日，愈來愈多人關注氣候暖化，鼓勵每個人做少少嘢挽救地球，例如換咗個鎢絲燈膽做慳電膽（世界上部份地區已禁用鎢絲膽）。不過英特爾就話，換咗個舊伺服系統，亦有助環保。

每次見到EMC香港阿頭Gabriel Leung，都少不免聽佢講起電腦耗能，（好似因為佢讀電機），以每部PC約用電在250-400瓦（ w），平均以300 w計，每日開機十小時，每月就用咗90度電。以目前每度電約一個二毫計，要俾成108蚊。

如果想你部電腦用幾多電，可以用以下電力計算機

http://www.journeysystems.com/?power_supply_calculator

不過，一般單處理器伺服系統，保守要用成400W電（用埋硬盤Mirror或者 RAID 5就一定唔得），24小時開動，全個月要288度電，即係約350蚊電費，貴過一部大雪櫃。所以如果利用虛擬化，減少伺服系統數量，可以慳返唔少電費。

今個星期，以英特爾新推出嘅Nehalem（Xeon 5500系列）技術為基礎嘅伺服器陸續出台，號稱以同樣電力輸出更多運算能力，英特爾話Nehalem能夠節省唔少電力開支，據講同樣運算效力，耗用嘅電力少三成。不過，CPU耗電以Xeon 5300 系列3.0 GHz速度四核心CPU嚟講，耗電量約120W。但係相同速度5500耗電量介於60瓦到95 W，支援1333 MHz的DDR3記憶體，所以整體速度會好啲。

Nehalem主要設計針對虛擬化算運，所以估計唔少人仍然會考慮換機。上星期，I記最先推出Nehalem架構嘅新System x，可以裝96GB至1T記憶體，講到認真犀利，話可以將電力開支降低九成幾。蘋果嘅Xserve亦推出咗Nehalem嘅新機種，同樣電力輸出嘅運算能力話高咗差唔多九成。上述數據只係聽番嚟，點計出嚟真係唔清楚。

今個星期，HP亦開始推ProLiant G6伺服系統，亦係採用Nehalem技術，TSG嘅Linda小姐話記住捧場。